Югары Осланда легаль булмаган мәшгульлеккә каршы комиссия утырышы узды
Югары Осланда легаль булмаган мәшгульлеккә каршы көрәш буенча республика ведомствоара комиссиясенең эш төркеме утырышы булды. Чараны Югары Ослан муниципаль районы башкарма комитеты җитәкчесенең беренче урынбасары Юлия Федотова җитәкләде.
Утырышта Федераль салым хезмәтенең Татарстан Республикасы буенча 3 нче районара инспекциясе башлыгы урынбасары Лилия Гайнетдинова катнашты.
Комиссия хезмәт законнарын үтәү өлкәсендә мәсьәләләр тудыручы кайбер оешмаларның эшчәнлеген җентекләп карады. Күз уңына хезмәт мөнәсәбәтләрен алыштыру билгеләре булган предприятиеләр, шулай ук турыдан-туры хокук бозулар ачыкланган предприятиеләр эләккән. Һөнәри керемгә салым түләүчеләр белән актив хезмәттәшлек итүче компанияләргә аерым игътибар бирелде: сүз 14 оешма турында бара, алар һәр килешү буенча уртача айлык 20 000 сумнан артык түләүләр белән уннан артык үзмәшгуль кеше белән хезмәттәшлек иткән.
Фикер алышуның шактый өлеше эре маркетплейслар — Wildberries һәм Ozon заказларын бирү пунктларында рәсми булмаган мәшгульлек проблемасына багышланган иде. Комиссия бу нокталарда хезмәт мөнәсәбәтләре тиешенчә рәсмиләштерелсен өчен адымнар ясарга ниятли.
Утырыш йомгаклары буенча эш төркеме әгъзалары һәр каралган оешма буенча конкрет карарлар һәм тәкъдимнәр әзерләделәр. Бу юнәлештәге эш Республика ведомствоара комиссиясе беркетмәсе нигезендә атна саен дәвам итәчәк.