Район башлыгы Евгений Варакин Югары Осландагы «Каенкай» балалар бакчасында капиталь ремонт барышын тикшерде
Сәфәр барышында муниципалитет җитәкчесе Башкарма комитет җитәкчесе урынбасары Алина Үтюгина һәм мәгариф бүлеге начальнигы Лилия Морозенкова белән ремонт эшләре бара торган мәйданчыкны карады һәм подряд оешмасы вәкиле белән төп мәсьәләләр турында фикер алышты.
Капремонт кысаларында мәктәпкәчә учреждениедә инженерлык коммуникацияләре тулысынча алыштырылып, бинаның эчке бизәлеше башкарылачак, шулай ук бинаның планы өлешчә камилләштереләчәк, бу аны балалар өчен дә, тәрбиячеләр өчен дә максималь уңайлы итәргә мөмкинлек бирәчәк.
Евгений Варакин азык-төлек блогын ремонтлауга аерым игътибар бирде, ул санитария нормаларына һәм куркынычсызлык таләпләренә максималь туры килергә тиеш.
Район башлыгы «Каенкай» балалар бакчасында ремонт эшләренең барышын уңай бәяләде. Ачыкланган җитешсезлекләр кыска вакыт эчендә бетереләчәк.