Әминә Сагдеева

Әминә апа авылыбызның иң олы,  зур хөрмәткә лаек  кешеләрнең берсе. Аның гомере бай тарихлы, шатлыклы-сөенечле көннәр белән бергә кайгылы –сагышлы вакыйгаларга да бай. Аның яшьлеге ачлык  елларның кыенлыклары да онытылып бетмәгән бер вакытка туры килә. Авыз тутырып икмәк ашарга насыйп булмый. Абыйлары сугышка китә, берсе югалып кала.

Апасы Гөлҗиһан белән яшьтән үк колхоз эшенә керешә, сугыш чорында башка авылдаш апалар белән Курал спирт заводы өчен утын әзерләүдә катнаша, авылдан читкә китеп, кышкы зәмһәрир салкыннарда Яшел Үзән районының Гари урманнарында да эшләргә туры килгән чаклар да була. Урак уру, печән чабу, башак җыю, ашлык суктыру, кырга тирес түгү-санап бетергесез эшләр. 

Ул сугышта яраланып кайткан яшьтәше авыл егете Сагдеев Галәутдинне үзенә пар итә, тормышка чыга. Аның  белән биш бала үстерәләр. Ире колхоз председателе, авыл советы рәисе, бригадир кебек җаваплы урыннарда эшли. Шуңа да өй эшләре, йорт тирәсендәге эшләр дә Әминә апа җилкәсенә төшә. Олылар әйтәләр бит, алла яраткан кешесенә сынауларны мул итеп бирә, чөнки ул аңа кыенлыкларга каршы тора алырлык көч тә бирә ди. Бу шулай да, Әминә апа күргәннәрне бер китапка гына язып бетерерлек түгел. Ул гомеренең авырлыкларыннан бер зарланмый, сабыр холыклы, авырлыкларга бирешми торган батыр хатын  булды. Кешеләр белән уен-мәзәк кушып, һәр эшнең җаен белеп башкарды. Гомере шулай колхоз эше, гаилә, балалар дип үтте. Инде күпләр Макыл җирлегендә тавык фермасы булганын оныткандыр да, ә ул шат күңелле, кешеләр белән мөлаем, тиз аралашучан, армый-талмый эшләүче  иптәш булып купләрнең күңелендә бүгендә саклана. Бар эшнең җаен белеп башкаргач, аның белән эшләве дә җиңел иде диләр. Илебез  Әминә апаның фидакарь хезмәтен олы бәяләп, аны юбилей медальләре белән бүләкләде. 

Балалары да аллага шөкер эшчән, һәрбере укып, тормышта үз урынын тапты. Олы кызы Фәния Макылда яши. Ике кызы Дания белән Фәридә гаиләләре белән Казанда тормыш  итәләр. Улы Галимҗан да Макылда яшәде, инде озак еллар гүр иясе. Балалар, үзләренең балалары белән бүген  әниләрен, әбиләрен  кадер –хөрмәттә тоталар.  Әминә апа  кече улы Динарис һәм килене Мөршидә тәрбиясендә яши. Алар инде 38 елдан артык бер гаилә булып шатлык-кайгыларны уртак итеп тату гына гомер кичерәләр. Бу елга тикле Әминә апа үз аягында йөрде. 

Бүгенге бәйрәм - Әминә апаныкы гына түгел балаларының, оныкларының да олы бәйрәме. Кем генә сокланмас, 95 яшь! Әминә апага, балаларына, туганнарына, оныкчыкларына киләчәктә таза исәнлектә,  бәхеттә, шатлыкта, куанычта, байлыкта яшәргә язсын.