Муниципаль районнар Югары Ослан муниципаль районы Район турында Авыл җирлекләре Введенский Бистәсе авыл җирлеге Яңалыклар лентасы Яңалыклар 2014 - I

Яңалыклар 2014 - I

19.12.2014
Халыкара инвалидлар көненә багышланган декада.
Декабрь аеның беренче декадасы Халыкара инвалидлар декадасы дип игълан ителде, шул уңайдан Введенка Бистәсе төп гомуми белем бирү мәктәбендә дә мөмкинчелекләре чикләнгән кешеләргә һәм аларны борчыган проблемаларга игътибар юнәлдерелде. Введенка Бистәсе төп гомуми белем бирү мәктәбенең өченче сыйныфы укучысы Павлова Ангелина башка укучылар кебек мәктәпкә йөреп белем алу мөмкинчелегеннән файдалана алмый, аны укытучы Маликова М.Ш. махсус программа буенча өй шартларында укыта.Мәктәптә укучылар Павлова Ангелина турында һәрвакыт белешеп торалар, бу көннәрдә алар Ангелинага атап рәсемнәр, сувенирлар әзерләде. Әти-әнисе мәктәпкә алып килгәч, Ангелина рәхәтләнеп яшьтәшләре һәм мәктәп укытучылары белән аралашты.

19.12.2014
Яңа елны каршылауга әзерлек
Декабрь –кыш беренче, елның соңгы ае. Введенка Бистәсе төп гомуми белем бирү мәктәбендә укучылар коллективы Яңа елны каршыларга зур әзерлек эшләре башлады. Мәктәп директоры Сергей Никифоров барлык укучыларны төрле бәйгеләрдә катнашырга чакырды: “Иң яхшы стенгазета”, “Яңа ел кичәсендә иң яхшы әкият”, “Иң матур бизәлгән сыйныф бүлмәсе” һәм “Иң яхшы бәйрәм костюмы”. 1- 9нчы сыйныф укучылары арасында җиңүчеләрне Яңа ел бәйрәмендә Кыш бабай һәм Кар кызы бүләкләре көтә.

19.12.2014
17нче декабрь көнне Введенка Бистәсе мәдәният йортында Бөек Җиңүнең 70 еллыгына багышланган «Буыннар хәтере – киләчәк казанышы” фестивалендә Югары Ослан районының 7 авыл җирлеге коллективы чыгыш ясады. Фестивальне тантаналы рәвештә Югары Ослан муниципаль районы башлыгы Марат Зиатдинов ачып җибәрде. Фестивальдә катнашучы һәр коллектив үзенчә тырышып әзерләнгән, һәр чыгыш тамашачы күңеленә хуш килде. Сугыш елларында каһарманлык һәм фидакарьлек үрнәге күрсәтүче әби-бабаларыбыз тырышлыгы илебез иреген саклаган, халкыбызга бәхетле киләчәк бүләк иткән.Бу турыда онытырга һич тә ярамый!

11.12.2014

11нче ноябрь көнне «Безнең музейларыбыз” дип аталган әдәбият дәресендә Введенка Бистәсе төп гомуми белем бирү мәктәбе укучылары татар теле һәм әдәбияты укытучысы Фәридә Зарипова белән авыл китапханәсе музеенда булдылар. Музей җитәкчесе Елена Суханова укучыларга мавыктыргыч итеп һәр экспонат турында сөйләде, аларның нинди юллар белән музейда барлыкка килүләрен аңлатты. Музейда халык көнкүреш әйберләре, алтмыш ел элек язылган кулъязмалар китабы, чигү әйберләре һәм башкалар – халкыбызның үткәне турында сөйләүче телсез шаһитлар.Аерым шкафта мәктәптә күп еллар буе балалар укыткан, хәзерге көндә лаеклы ял итүче ветеран укытучы Тарасова Екатерина Филипповна чиккән ашъяулык, сөлгеләр, мендәр тышлары һәм аның тормыш юлы, хезмәт еллары турында истәлекләре, фоторәсемнәр.... Укучылар зур кызыксыну белән экспонатларны карадылар, ветеран укытучы Юмакулова Флера Файзрахмановна архивыннан күргәзмәдәге рәсемнәр белән сокландылар. Музейга сәяхәт тәэсирләрен алар иншада сурәтләр, киләчәктә дә халык тарихын өйрәнүне дәвам итәрләр.

01.12.2014
Волейбол ярышында
Югары Ослан районы укытучылар коллективлары арасындагы спартакиада дәвам итә. 1нче декабрь көнне Введенка Бистәсе төп гомуми белем бирү мәктәбе коллективы спорт сөючеләре командасы Югары Ослан гимназиясендә волейбол ярышында катнашты. Бу ярышта иң көчлеләрдән саналган өч команда очрашты, җиңү өчен көрәш бик җитди булды. Уенның җиңүчесе - Введенка Бистәсе мәктәбе спортчылары командасы, икенче урынны - Түбән Ослан мәктәбе волейбол сөючеләре командасы, өченче урынны Вахитов мәктәбе коллективы спортчылары командасы яулады.Җиңүче медале укытучылар командасының зур горурлыгы булса, спорт белән шөгыльләнү педагогларга күңел күтәренкелеге, сәламәтлек һәм җитезлек өсти.

29.11.2014
Югары Ослан районы мәктәпләре педагоглары арасында спорт ярышлары дәвам итә. 29нчы ноябрь көнне Введенка Бистәсе төп гомуми белем бирү мәктәбенең спорт сөюче укытучылары Нуруллин М. Х. һәм Титкова М. А. Бадминтон ярышында катнашты. Ике этаптан торган бу ярышта районның утызлап спорт сөючесе көрәште. Хатын-кыз спортчылары арасында Введенка Бистәсе төп гомуми белем бирү мәктәбенең башлангыч сыйныфлары укытучысы Мария Титкова икенче урынга лаек булды. Уңган, акыллы, тырыш һәм җитез укытучы апалары Мария Александровна - яраткан укучылары өчен һәр яктан үрнәк булып тора.

28.11.2014
Введенка Бистәсе төп гомуми белем бирү мәктәбенең спорт сөюче укытучылары командасы 25нче ноябрь көнне Яр буе Морквашы урта мәктәбендә булды. Югары Ослан районы мәгариф хезмәткәрләре арасындагы спартакиаданың чираттагы этабы - волейбол уенын сөючеләр очрашуы.Бу турнирда Введенка Бистәсе педагоглары командасы беренче урынны, Яр буе Морквашы укытучылары командасы икенче урынны, Татар Борнашы мәктәбе командасы – өченче урын яулады.Волейбол сөючеләрнең киләсе очрашуы 1нче декабрьдә җиңүчеләр арасында ярышта булачак.

28.11.2014
27нче ноябрь көнне Введенка Бистәсе авылы мәдәният йортында Әниләр көненә багышланган концерт булды. Бәйрәм концертында актив катнашучылар – мәктәп укучылары һәм яшь укытучылар. 2,3,6нчы сыйныф укучылары бәйрәмгә җырлар, шигырьләр әзерләгән. Бәйрәмдә укучылар әниләренә үзләре әзерләгән бүләк –открыткаларын тапшырдылар. Концертны бәйрәм кунагы – Федор Ибрагимович Алкин дәвам итте, ул үзенең яраткан җырларын башкарды, шигырьләрен сөйләде.

28.11.2014
28 нче ноябрь көнне Введенка Бистәсе төп гомуми белем бирү мәктәбе укучысы Никита Сладкин “Иннополис – киләчәк шәһәре” дип аталган рәсем бәйгесендә катнашып җиңүгә иреште. Никита беренче сыйныфта укый башлаганнан бирле мәктәпнең иң актив укучыларыннан санала, ул – яхшы спортчы да. Буш вакыттында Никита рәсем ясарга бик ярата. Аның рәсемнәрен еш кына мәктәп укучылары рәсемнәре күргәзмәсендә күрергә мөмкин.Бу җиңү - аның тагын да дәрәҗәле бәйгеләрдә катнаша алуына дәлил.

20.11.2014
20нче ноябрь көнне Введенка Бистәсе төп гомуми белем бирү мәктәбенең башлангыч сыйныф укучылары "Дәүләт символларын беләсезме?" дип исемләнгән чарада катнашты.Башлангыч сыйныфлар укытучысы Мария Титкова укучыларга берничә этаптан торган уен тәкъдим итте. Укучылар бу чарада бик теләп катнашты, җыр сөюче балалар укытучы апалары белән бергә Россия Федерациясе һәм Татарстан Республикасының дәүләт гимннарын башкарды.

20.11.2014
“Киләчәк заман шәһәре” рәсемнәре бәйгесендә катнашу бәхете – Введенка Бистәсе төп гомуми белем бирү мәктәбе укучыларына икенче тапкыр тәтеде. Авылның олы яшьтәге кешеләре өчен ят булган бу шәһәрчек көнләп түгел, сәгатьләп үскән вакытта мәктәп укучылары аның киләчәген рәсемдә төшерә ала. Иннополис оешмасы вәкиле Диана Пермякова укучыларга “Киләчәк заман шәһәре”н ничек күзаллауларын рәсемдә төшереп бәйгедә катнашырга тәкъдим итте.Диана балаларга акварель буяулар,төрле размердагы рәссам пумалалары, рәсем кәгазе өләште, булачак шәһәрнең макетларын күрсәтте. Һәр укучы үзенчә тырышты, кабатланмас рәсем иҗат итәргә көчен дә, күзаллавын да кызганмады.Бәйге җиңүчесенең бүләге дә бик оригиналь - иң яхшы рәсемнәрне оешманың Яңа ел котлауларына урнаштырачаклар!

20.11.2014
19нчы ноябрь көнне Введенка Бистәсе төп гомуми белем бирү мәктәбендә 5-9нчы сыйныф укучылары өчен берләштерелгән сыйныф сәгате булды. «Кануннар кайда туа?» дип аталган «парламент дәресе”н мәктәпнең тарих һәм җәмгыять белеме укытучысы Александр Алексеев оештырды. Ул укучыларга Россия Федерациясенең һәм Татарстан республикасының дәүләт органнары системасы турында сөйләде, «конституция», «парламент», “дәүләт” төшенчәләрен аңлатты. Укучылар дәүләт символларын искә төшерделәр, “Кануннар кайда туа?” исемле викторинада катнашып, үзләренең белемнәрен күрсәтә алдылар.

15.11.2014
14нче ноябрь көнне Введенка Бистәсе төп гомуми белем бирү мәктәбендә Югары Ослан муниципаль районының рус теле һәм әдәбияты укытучылары җыелды. “Белем бирүдә яңа буын федераль дәүләт стандартлары таләбендә укучыларны рус теле һәм әдәбият дәресләрендә, класстан тыш чараларда әхлакый-патриотик тәрбияләү” дип аталган семинарда алар 5нче сыйныф укучыларның рус теле дәресендә, 7нче сыйныф укучыларының әдәбият дәресендә булдылар, “Минем туган ягым” исемле класстан тыш чарада катнашып, якташ шагыйрә Елена Абрамова белән очраштылыр.Рус теле һәм әдәбияты укытучылары А.М.Ширяева һәм В.В.Тяганова хезмәтен район белгечләре югары бәяләде, Введенка Бистәсе мәктәбе оештырган чаралар кунаклар күңелендә матур тәэсир калдырды.

15.11.2014
Киңәшле эш таркалмас
13нче ноябрь көнне Введенка Бистәсе төп гомуми белем бирү укучыларының класстан тыш ялын оештыручы Әлфия Бегомутдинова Югары Ослан ТГББ мәктәбендә киңәшмәдә булды. Семинарны оештыручы район белгече Н.Биктаһирова республикадагы барлык балалар оешмалары эшчәнлеген берләштерүне оештыру турында чыгыш ясады, бердәм мәгълүмати базаның әһәмиятен аңлатты. Беренче елын бу вазыйфаны башкаручы Әлфия Бегомутдинова үзен кызыксындырган күп сорауга җавап алды.

07.11.2014
Балалар өчен җир йөзендә әниләрдән кала иң кадерле кеше булган кеше – беренче укытучы, башлангыч сыйныф укытучысы гомер буена бала күңелендә якты эз калдыручы зат.Введенка Бистәсендә гомер итүче, мәктәп укучыларына 51 ел хезмәт күрсәткән ветеран укытучы Тарасова-Соколова Екатерина Филипповна шундый затларның берсе. Бәхетле картайган көннәрендә дә: хәтере анык, йөзе ягымлы, сөйләме матур, янында аның өчен өзелеп торган кызлары, торыр урыны җылы, җайлы. Якын-тирә авыллардагы барлык балаларны да башлангыч мәктәптә укытучы апаны 85 яше белән котлап килүчеләрнең һәрберсен ачык йөз белән каршылый, ягымлы итеп сөйләшә, кызыклы истәлекләре белән бүлешә.Укытучы хезмәтенең җимеше еллар аша күренә: хөрмәтле укытучысын юбилее белән котлап Казаннан килгән “укучы”ның үзенә дә 68 яшь. Рәхмәт сиңа, Укытучы, үз вакытында балаларның күңеленә хәерле орлык сала белгәнең өчен!

30.10.2014
27нче октябрь көнне Введенка Бистәсе төп гомуми белем бирү мәктәбендә наркотикларга каршы чаралар айлыгы кысасында укучыларның бердәм сыйныф сәгате оештырылды. Мәктәп укучыларының дәресләрдән тыш ялын оештыручы Әлфия Бегомутдинова 5-9нчы сыйныф укучыларына наркотик матдәләр һәм аларның кеше гомеренә янавы турында мәгълүматлар белән таныштырып лекция укыды. “Без – сәламәт яшәү рәвешен сайлыйбыз” темасына әңгәмәдә һәр укучы уатнашып үз фикерен белдерде. Сыйныф сәгатендә балалар әлеге темага кыска метражлы фильм карады, статистика мәгълүматлары белән танышты. Укучыларның бу куркыныч матдәләрдән ерак торырга кирәклеген аңлавы – чараның иң төп максаты, әлбәттә.

30.10.2014
Кышка витаминлы ризык
Быел Введенка Бистәсе төп гомуми белем бирү мәктәбе кишәрлегендә бәрәңге, кишер, кыяр, кәбестә бигрәк тә уңды. Җәй көннәрендә башкарылган хезмәтнең нәтиҗәсе укучыларның үзләрен бигрәк тә шатландыра. Җәй көне ашханәдә ашарлык кыяр тозланса, көзен бер өлеш кишерне кыргычта уып суыткычларда туңдырып куйдык. Бәрәңгене, кишерне матурлап кышлыкка урнаштыргач, кәбестәгә дә чират җитте. Шимбә көнне дәресләрдән соң һәр укучыга өлеш чыкты: беренче группа укучылары кәбестәне иске яфраклардан арындырып тора, икенчеләре кишер чистарта, өченчеләре кишерне кыргычта уа, ә укытучы апа-абыйлар кәбестәне турап, тозлый бара. Галимнәр фикеренчә, үзең үстереп, үз кулларың белән әзерләнгән ризык - иң тәмлеләрдән генә түгел, иң файдалысы да!

30.10.2014
Интернетта сак булу мөһим
28нче октябрь көнне Введенка Бистәсе төп гомуми белем бирү мәктәбе укучылары Интернет челтәрендә куркынычсызлыкка багышланган берләштерелгән дәрестә булдылар. Информатика укытучысы Марат Нуруллин укучыларны Интернет челтәрендә булган бик күп куркыныч барлыгын һәм алардан саклану чараларын аңлатты. Кыска метражлы фильм ярдәмендә дә укучыларга ул бу мәгълүматларны җиткерергә тырышты. Бүгенге көндә бик уңайлы мәгълүмат чыганагы гына түгел, бигрәк тә яшүсмерләрнең яраткан аралашу чарасы булган Интернеттан дөрес файдалану бик мөһим.

30.10.2014
Без сәламәт яшәү рәвешен сайладык!
29нчы октябрь көнне Введенка Бистәсе төп гомуми белем бирү мәктәбе укучылары “Без наркотикларга каршы” айлыгы кысаларында оештырылган чаралар нәтиҗәсе буларак оештырылган рәсем бәйгесе йомгаклары белән танышты. Укучыларның иң яхшы дип табылган хезмәтләре район бәйгесендә катнашачак. Яңа заманның иң куркыныч чире – наркомания гөнаһсыз сабыйларны читләтеп узсын!

30.10.2014
Тәҗрибә уртаклашабыз
22нче октябрь көнне Введенка Бистәсе төп гомуми белем бирү мәктәбе укытучысы Мария Титкаова Куралово урта мәктәбендә оештырылган Югары Ослан мәктәпләренең башлангыч сыйныф укытучыларының семинарында катнашты. Укытучыларның бер-берсенең эш тәҗрибәсен өйрәнү һәм хезмәти уңышлар белән уртаклашу максатыннан мәктәпнең 1,2,3 һәм 4нче сыйныфларында үткәрелгән дәресләрне караганнан соң, семинарда катнашучы укытучылар “Чәч эләктергече әзерләү” дигән мастер-класс та катнашты. Эш көненең нәтиҗәсен ясау өчен, көн азагында төрле мәктәпләрдән килгән кунаклар түгәрәк өстәл артында аралашып, семинарда туган фикерләре белән уртаклаштылар.

24.10.2014
Спортка мәхәббәт берләштерә!
23нче октярь көнне Введенка Бистәсе төп гомуми белем бирү мәктәбендә күрше “Яр буе Морквашы” урта мәктәбеннән кунаклар булды. Спорт сөюче ике команда күңелле ярышларда көч сынашты. Введенка Бистәсе мәктәбенең 5-9нчы сыйныф укучыларыннан торган “Формула-1” командасы кунакларны 10га ике исәбеннән отты. Мәктәпнең физкультура укытучысы Рамис Миначев “укучыларның уңышы аларның спорт яратуларыннан килә,” -дип аңлата. Мәктәпнең спорт залында кирәкле барлык шартлар да тудырылган, укытучы да хезмәтен яратып башкаручы тәҗрибәле белгеч. Шуңа күрә укучыларның физкультура дәресләрен яратуы бер дә гаҗәп түгел, тик шатландыра гына.

18.10.2014
Рәсем бәйгесе
Көз – ел фасылының иң бай чоры: алтынсу яфраклар, кызыл, сары алмалар һәм башка җиләк – җимешләр. Күзне камаштырырлык бу матурлык элек-электән бик күпләрнең игътибарын җәлеп иткән: шагыйрьләр, рәссамнар үзләренең иң күркәм әсәрләрен көзге матурлыкка сокланып иҗат иткән, - дисәк тә ялгыш булмас.Введенка Бистәсе төп гомуми белем бирү мәктәбендә игълан ителгән рәсем бәйгесе дә көз темасына иде. Менә, ниһаять, 18нче октябрь көнне бәйгегә нәтиҗә ясалды.Кечкенә рәссамнар арасында – Морозов Денис, Алиев Немат; уртанчы звенода-Фаляхов Артур, Борзенко Настя, өлкәннәрдән Сладкин Никита һәм Мишагина Регина җиңүчеләр дип табылды.Афәрин, укучылар! Кабатланмас табигый матурлыкны күрә белү – үзе бер бәхет.

18.10.2014
Көзге балга рәхим итегез!
18нче октябрь көнне Введенка Бистәсе авыл мәдәният йортында укучы балалар өчен Көзге бал оештырылды. Мәктәп укучыларының дәресләрдән соң ялын оештыручы Әлфия Бегомутдинова балалар белән башта оештыру эшләре алып барды. Ниһаять, Көзге балда катнашу теләге белән янган укучылар бу көнне көтеп алды. “Иң оригиналь күлмәк”нең хуҗасы -3нче сыйныф укучысы Әминә Титкова,”Иң яхшы рәсем” авторлары –Сладкин Никита һәм Мишагина Регина. “Көзге чәчәк бәйләме” бәйгесенең җиңүчесе – Сладкина Анна. Төрле күңелле бәйгеләрдә барысының да катнашырга теләге зур булды. Ниһаять, Көзге балның хуҗабикәсе дә мәгълүм булды, ул –Титкова Әминә. Балаларын күрергә килгән ата-аналарга да бәйрәм программасы ошады, укучылар да күңелле ял итте.

18.10.2014
Күңелле ярыш
18нче октябрь көнен Введенка Бистәсе укучылары бик зарыгып көтте. Нигә дисезме? Дәресләрдән соң спорт залында ярышка җыелды алар. Мәктәпнең 5-9нчы сыйныф укучыларын “Күңелле эстафеталар” көтә. Менә физкультура укытучысы Рамис Миначев аларны ике командага бүлде. Һәр команда үзенең капитанын сайлады, исем һәм девиз уйлап тапты.Ярыш барышында яшь спортчылар күп төрле эстафеталар үтәде, һәркем үзенең көчен, җитезлеген сынады. Ярышлар “Молния” командасының җиңүе белән тәмамланды.Бу команда уенчылары җитез, көчле, өлгер генә түгел, ә үзара бердәм булдылар, шуңа күрә дә җиңү – аларга.

15.10.2014
Инглиз телендә әкиятләр укыйбыз
Менә алтын көз дә килеп җитте, авыл җирлегендә яшәүчеләрнең җирдәге мәшәкатьләре кимеде. Введенка Бистәсе мәдәният йортында авыл халкы өчен түгәрәк эшләрен яңартып җибәрделәр. Инглиз телен өйрәнүчеләр өчен түгәрәктә яңа юнәлеш өстәлде, ”Инглиз әкиятләрен укыйбыз” дип атала ул. Түгәрәккә йөрүче балаларга инглиз теленең грамматикасы һәм лексикасын өйрәнү генә түгел, бөек Шекспир телендә әкиятләр уку мөмкинлеге дә булдырылды.Беренче очрашуда балалар рәхәтләнеп бу айдан шөгыльләнә башлыйсы яңа уку әсбапларын карадылар. Хәерле юл, сезгә, киләчәктә яңа ачышлар ясаучылар!

13.10.2014
Татарстан ярминкәләрендә катнаштык
Татарстан республикасында һәр елны шәһәрләрдә авыл хуҗалыгы продукциясен күпләп сату буенча көзге ярминкәләр оештырыла. Быел республика ярминкәләре кысасында Введенка Бистәсе төп гомуми белем бирү мәктәбе коллективы да катнашты: Казан шәһәре халкына мәктәп яны кишәрлегендә үстерелгән кишер, бәрәңге, кәбестә, ташкабак һәм кабак тәкъдим итте. Бәяләрнең бик кулай һәм яшелчәләрнең күп күләмдә, югары сыйфатлы булуы сатып алучыларны җәлеп итә. Мәктәп бакчасында үскән яшелчәләр, бигрәк тә кишер:үзе матур, шоп-шома, татлы, сусыл - шәһәр халкының күңеленә хуш килде, бик тиз сатылып бетте.

09.10.2014
Югары Ослан районы укытучыларына бәйрәм бүләге
8нче октябрь көнне Югары Ослан районы мәдәният йортында Укытучылар көненә багышланган зур бәйрәм булды.Бәйрәмне оештыручылар – район мәгариф бүлеге белгечләре Укытучылар көненә район мәктәпләрендә эшләүче барлык укытучыларны, лаеклы ялдагы педагогларны кунакка чакырып, зур концерт күрсәттеләр. Концерт программасын алып баручы Введенка Бистәсе төп гомуми белем бирү мәктәбе укытучылары Әлфия Бегомутдинова һәм Марат Нуруллин ягымлы матур тавышлары белән тамашачыларның күңеленә хуш килде. Югары Ослан районы мәктәпләрендә нинди сәләтле балалар укый һәм педагоглар эшли икән бит! Бер-береңнең уңышка ирешүен күреп, ихлас күңелдән шатланып ял итү үзе бер олы бүләк.Бәйрәмне оештыручыларга барлык тамашачылар исеменнән зур рәхмәт!

08.10.2014
Укытучылар көненә концерт
Введенка Бистәсе төп гомуми белем бирү мәктәбе укучылары 3нче октябрь көнне укытучылар коллективын һөнәри бәйрәм – Укытучылар көне белән котлап зур концерт күрсәтте. Бәйрәм программасын мәктәп укучыларының дәресләрдән соң ялын оештыручы Әлфия Бегомутдинова барлык укучылар катнашында әзерләде: 1нче сыйныф укучылары бәйрәмгә багышланган шигырьләр сөйләде, 2-3нче сыйныф укучылары һәм сыйныф җитәкчесе Мария Титкова балалайкада уйнап күңелле җыр тәлгәше бүләк иттеләр, 5-6нчылар артистларча кызыклы инсценировкалар күрсәтте, 7нчеләр укытучылардан бәйрәмгә репортаж алып әзерләгән, 8-9нчы сыйныф егетләре шаян формада котлауны сайлаганнар. Укытучылар өчен иң зур бүләк булган укучылар концерты бик шәп оештырылган,”артист”ларның чыгышы тамаша кылучыларның барысына да бик ошады!

02.10.2014

Олыласаң олыны, олыларлар үзеңне
1нче октябрь - Өлкәннәр көне уңаеннан, Введенка Бистәсе төп гомуми белем бирү мәктәбе укучылары һәм укытучылары катнашында авылның мәдәният йортында зур концерт оештырылды. Концертны алып баручылар - математика укытучысы Марат Нуруллин һәм инглиз теле укытучысы Әлфия Бегомутдинова төзегән программа авылның өлкән буын кешеләренең күңеленә хуш килде. Авылыбызның олы кешеләрен Введенка Бистәсе авыл җирлеге башлыгы Дмитрий Морозов бәйрәм белән котлады. Бу көнне Петропавловкада яшәүче Анастасия Испуганованың икеләтә бәйрәме, 1нче октябрь - аның туган көне дә. Күңелле концерт номерлары гаҗәеп матур тавышлы апалы –сеңелле Наташа һәм Настяның җырларына үрелеп барды, 2-3нче сыйныф укучыларының чыгышы өлкәннәргә бигрәк ошады, алкышларга күмелде. Концерт азагында кунакка килгән өлкәннәр рәхәтләнеп биеде. Концерттан соң өлкәннәргә спонсорлар ярдәме белән оештырылган тәмле күчтәнәчләр өләшеп , “Казан” тау чаңгысында шуу комплексы автобусында өйләренә озаттылар.Бәйрәмгә килә алмаучы өлкәннәрне мәктәпнең волонтерлар отряды әгъзалары өйләренә барып котлады.

29.09.2014
29нчы сентябрь көнне Введенка Бистәсе төп гомуми белем бирү мәктәбе укучылары рус теле буенча бөтенрәсәй олимпиадасының мәктәп турында катнашты. Бу чараны мәктәпнең рус теле һәм әдәбияты укытучысы Валентина Тяганова җитәкләде. Олимпиада биремнәре бик катлаулы, монда грамматика кагыйдәләрен белү генә җитми. Кайбер биремнәр катлаулы башваткычны хәтерләтә: яхшы хәтер, зиреклек һәм фикерләү сәләте таләп итәләр. Әлбәттә, укучыларның барысы да бик тырышты. Рус теленең аеруча катлаулы фән булуында тагын бер кат инанды алар.

26.09.2014
Наркотик матдәләрне куллануга каршы чара
24нче сентябрь көнне Введенка Бистәсе төп гомуми белем бирү мәктәбе китапханәчесе Елена Суханова укучылар белән наркотик матдәләрне куллануга каршы чара оештырды. Әңгәмә барышында ул укучыларның бу терминнарны ничек аңлаулары турында сорашты.Башта колакка ятыш булмаган бу терминнарны ишетеп, укучылар уйланып калды, соңыннан ярдәмчел сорауларга актив җавап бирделәр. Бу чараның төп максаты – укучыларны бу төрдәге матдәләрне авыз итүдән, кулланудан саклау. Балалар дөрес нәтиҗә ясады: Елена Анатольевна күрсәткән роликтагы куркыныч хәлләргә төшмәс өчен наркотик матдәләрне кулланмаска гына кирәк!

26.09.2014
«Авыл укытучысы»
25нче сентябрь көнне ТР Мәгарифне үстерү институтында “Мәгариф” журналы редакциясе хезмәткәрләре оештырган «Авыл укытучысы» - «Сельский учитель» 2014 г бәйгесенең III туры булды. «Яңа заман авыл укытучысы” дип аталган бу бәйгедә оештыручылар илебезнең төрле төбәкләрендә яшәп хезмәт итүче, төрле фәннәр укытучы мөгалимнәрдән 500дән артык эссе кабул иткән, шуның унысын җиңүче итеп сайлаган. Ун эшнең берсе - Введенка Бистәсе төп гомуми белем бирү мәктәбенең татар теле укытучысы Фәридә Зарипованың “Җир кешесен тәрбияләргә” дип аталган эше. Җиңүче дип табылган ун номинант та мәртәбәле жюри әгъзаларына үзләренең һөнәри осталыкларын күрсәтеп, “Мәгариф” журналының баш мөхәррире Илдар Миргалив тарафыннан рәхмәт хатлары һәм кыйммәтле бүләкләр алды.

19.09.2014
Әнигә бүләкне үзебез әзерлибез
18нче сентябрь көнне Введенка Бистәсе төп гомуми белем бирү мәктәбенең 5-9нчы сыйныф укучыларына берләштерелгән сыйныф сәгате оештырылды. Сыйныф җитәкчесе Фәридә Зарипова башта укучыларга лалә чәчәген алдан үстерү турында ике телдә төзелгән презентация күрсәтте. Укучылар яңа сүзләрне кабатлый-кабатлый башта кышын өй шартларында лалә суганчасын чәчәк аттыру технологиясен өйрәнделәр, ә аннан соң һәркем чүлмәккә туфрак, ком, черемә, көл һәм пычкы чүбен катнашырып лалә чәчәгенең суганчасын утыртты, су сипте.Декабрь азагына кадәр чүлмәкләрне салкынча һәм дымлы урында саклыйсы, аннары әкренләп җылыга чыгарып 8нче мартка чәчәк аттырасы бар.Кадерле әнигә иң яхшы бүләк – үзең үстергән чәчәк.Эшегез уңышлы булсын, укучылар!

19.09.2014
Мәктәптә көзге кросс
Бүген, 19нчы сентябрь көнне Введенка Бистәсе төп гомуми белем бирү мәктәбе укучылары көзге кросста катнашты. Физкультура укытучысы Рамис Миначев 1-9нчы сыйныф укучыларын тиешле группаларга бүлеп, җәйге спорт төрләреннән иң киң таралганы– йөгерү буенча ярыш оештырды. Кызлар арасында җиңүчеләр Нурмухаметова Аделина һәм Борзенко Анастасия һәм укучы малайлар арасыннан җиңүчеләр Белов Дмитрий белән Борзенко Дмитрий иң җитезләр булып чыкты. Мәктәп ярышында җиңүчеләр иртәгә район укучылары арасында көч сынашачак. Уңышлар сезгә, җитезләрнең җитезе!

15.09.2014
Бәрәңге быел уңды!
Йодрык кадәрле,
Йомры гәүдәле,
Их, тәмле, эх!
Бигрәк тәмле бәрәңге!
Шимбә көнне Введенка Бистәсе төп гомуми белем бирү мәктәбе укучылары һәм укытучылар коллективы мәктәп яны кишәрлегендә үстерелгән бәрәңге уңышын җыю белән мәшгуль булды. Ир укытучы һәм укучы малайлар көрәк белән казып алды, кызлар бәрәңгене җыя барды. Уңыш җыючыларның шатлыгы зур: быелгы бәрәңге артык күп булмаса да, эре булып үскән. Җәй көннәрендә җирне йомшартып, чүп үләннәрен утап һәм бәрәңгене коларадо коңгызларыннан арындырып тору бушка китмәгән. Укучылар уңышны күреп бик шатланды һәм уңыш җыюда барысы да бик тырышып эшләделәр. Бу бәрәңгенең тәме дә искиткеч булачак, чөнки балалар аны үзләре үстерде бит!

15.09.2014
Туган көнең белән, Алия!
Туган көн – иң күңелле бәйрәм! Бүген Введенка Бистәсе төп гомуми белем бирү мәктәбе укучысы Нурмухаметова Алиянең туган көне. Зур тәнәфестә Алияне котларга барлык укучылар түгәрәккә басты. Һәр укучы Алияне котлап аңа комплементлар әйтте, балалар җырлар җырлап, күңелле уеннар уйнадылар.Дәресләрдән соң, 5 нче сыйныф укучылары һәм сыйныф җитәкчесе Валентина Тяганова күчтәнәчләр белән тәмле чәй эчтеләр, Алиягә матур теләкләр теләделәр.

12.09.2014
Юл йөрү кагыйдәләрен бел һәм үтә!
Бүген, 12нче сентябрь көнне Введенка Бистәсе төп гомуми белем бирү мәктәбендә 6нчы сыйныф җитәкчесе Марат Нуруллин мәктәп укучыларын берләштерелгән сыйныф сәгатенә чакырды. “Юлда балалар иминлеге” дип аталган сыйныф сәгатендә 1-9нчы сыйныф укучылары катнашты. Марат Халилуллаевич укучылар белән юл йөрү кагыйдәләрен кабатлады, бирелгән темага әзерләнгән презентация күрсәтте, юл һәләкәтләре буенча “куркыныч”статистика белән таныштырды.Укучыларга авыл җирлегендә яшәүче балаларга да юл йөрү кагыйдәләрен бик яхшы белергә һәм үтәргә кирәклеген аңлатты ул.

12.09.2014
Мәктәптә яңа җиһазлар
Яңа уку елында Введенка Бистәсе төп гомуми белем бирү мәктәбенең башлангыч сыйныф кабинетларына яңа җиһазлар куелды. 1,2,3нче һәм урта звеноның 5нче сыйныфы укучылары быелгы уку елын яңа өстәлләр артында, яңа урындыкларда утырып укый башлады. Бу гаять кирәкле ярдәмне ТР премьер-министры, элемтә һәм информатизация министры Р.А. Шәйхетдинов күрсәтте.Мәктәпкә зур ремонт ясалганнан, соң шактый искергән җиһазларны алыштыру – укучылар һәм укытучылар коллективы өчен бик әһәмиятле бүләк.

09.09.2014
Мәктәптә Финанс белеме көне
5нче сентябрь көнне Введенка Бистәсе төп гомуми белем бирү мәктәбендә Финанс белеме көне булды. Мәктәпкә Югары Ослан муниципаль районы финанслау бүлеге белгече Козина Светлана килде. Мәктәп укучылары һәм укытучылары “Акча санарга өйрән” дигән темага лекция тыңладылар. Укучылар акча саный белүнең кеше тормышында гаять әһәмиятле булуын аңлады. Лекциядән соң, Светлана Анатольевна укучыларны һә м укытучыларны кызыксындырган сорауларга җавап бирде.Очрашу укучылар өчен бик файдалы булды.

09.09.2014
Сәламәтлек сәгате
9нчы сентябрь көнне Введенка Бистәсе төп гомуми белем бирү мәктәбендә Балаларның иминлеген саклау айлыгы уңаеннан 5-9нчы сыйныф укучылары өчен берләштерелгән сыйныф сәгате булды. Сыйныф җитәкчесе Фәридә Зарипова укучыларга видеофильм һәм “Беренчел медицина ярдәме” исемле презентация күрсәтте. Сыйныф сәгатенә Введенка Бистәсе акушерлык пункты фельдшеры Сәвия Игнатьева чакырылган иде. Ул укучыларга еш була торган очраклар: шөпшә яки эт тешләгәндә,киселгән яки бәрелгән яраларны ничек эшкәртү турында сөйләде, беренчел ярдәм күрсәтергә өйрәтте. Һәр укучы көндәлегенә Сәвия Вәгыйзевнаның телефон номерын язып куйды: кирәк була калса ярдәмгә чакыр!

08.09.2014
Балалар иминлеге айлыгы кысаларында бәйге
Бүген, 8 нче сентябрь көнне Введенка Бистәсе туп гомуми белем бирү мәктәбендә “Балалар иминлеге” айлыгы кысаларында укучыларга бәйге игълан ителде. Башлангыч сыйныф укучылар өчен “Мин юл йөрү кагыйдәләрен беләм” исемле рәсем бәйгесе, ә 5-9нчы сыйныф укучылары өчен куркынычсызлык кагыйдәләрен бел һәм үтәү темасына иншалар бәйгесе оештырылды. Бу чараларның максаты – җәйге каникул вакытында онытылган кагыйдәләрне искә төшерү, гадәттән тыш ситуацияләрдә, сәламәтлеккә куркыныч янаган очракларда укучыларның үзләрен саклап калу ысулларын кабатлау.

08.09.2014
Укытучылар да Бердәм дәүләт имтиханы тапшыра
4нче сентябрь көнне Введенка Бистәсе төп гомуми белем бирү мәктәбе укытучылары Тяганова Валентина һәм Нуруллин Марат Татарстан Республикасының белем бирү сыйфаты мониторингы үзәгендә булдылар. Алар да, нәкъ укучылар кебек, үзләре укыта торган фәннәрдән бердәм дәүләт имтиханы биремнәрен үтәде. Аттестация үтүче һәр укытучы, бүгенге тәлапләр буенча башта үзе дә шундый имтихан тапшыра. Бердәм дәүләт имтиханын тапшыру шартлары бик кырыс: кәрәзле телефоннан файдаланырга ярамый, бүлмәләрдә видеокамералар урнаштырылган һәм чикләнгән вакыт кысаларында биремнәрне үтәп, җавапларны махсус каралы ручкалар белән махсус бланкларга тутырасы. Нәтиҗәләр уңышлы булсын!

04.09.2014
Мәктәптә “Балалар иминлеге” айлыгы
Введенка Бистәсе төп гомуми белем бирү мәктәптәбендә “Тормыш иминлеге нигезләре” дәресләрен укытучы Николай Александров мәктәп коллективының эвакуациягә әзерлеген тикшереп карады. Бу чара “Балалар иминлеге” айлыгы рамкасында ел саен уздырыла.Бу юлы,яңа уку елында беренче тапкыр 1-9нчы сыйныф укучылары һәм укытучылар 32 секунд эчендә мәктәп бинасыннан чыгып, мәктәп ишегалдында тезелде.ТИН укытучысы Николай Федоровичны бу нәтиҗә кәнагатьләндерде, ул укучыларга тормыш куркынычсызлыгы буенча балаларга инструкция үткәрде, куркынычсызлык кагыйдәләрен үтәүнең һәр кеше өчен әһәмиятле булуын аңлатты.

04.09.2014
Беслан шәһәрендә һәлак булучыларны искә алу көне.
3нче сентябрь көнне Введенка Бистәсе төп гомуми белем бирү мәктәбе укучылары гомумимәктәп линейкасында терроризмга каршы көрәштә теләктәшлек белдереп, Беслан шәһәрендә һәлак булучыларны искә алды. Укучыларның дәресләрдән соң ялын оештыручы Әлфия Бегомутдинова укучыларга ун ел элек Беслан шәһәренең 1нче мәктәбендә булган теракта 186 бала һәм 148 олы кеше һәлак булуы, 810 кеше яралануы турында сөйләде. Террорчылар балалар гомерен өзеп үзләренең көчсезлекләрен күрсәтте.Терактны оештыручы – намуссыз һәм кешелексез кешеләргә, балалар канын коеп, гөнаһсыз кешеләрнең гомерен өзүчеләргә Җир йөзендә урын юк!

02.09.2014
Мәктәптә беренче гомуми линейка
Бүген, 2нче сентябрь көнне Введенка Бистәсе төп гомуми белем бирү мәктәбе укучылары беренче тапкыр гомуми линейкага җыелды. Мәктәп директоры Сергей Никифоров укучыларны тагын бер кат уку елының башлануы белән котлады һәм балаларга укучыларның төп кагыйдәләрен кабатлады.Барлык укучыларны да ата-аналары пөхтә итеп мәктәп укучысы формасына киендергән, уку-язу әсбапларын булдырган. Укучыларга яңа киемнәрне, уку-язу әсбапларын һәм мәктәп җиһазларын саклап тотарга, мәктәп тормышында актив катнашырга! Дәресләрдән соң укучылар ялын оештыручы педагог Әлфия Бегомутдинова укучылар коллективын балалар иминлеге айлыгын үткәрү планы белән таныштырды, төрле чараларда актив катнашырга чакырды.

02.09.2014
Бишенчеләрнең беренче укку көннәре
Бишенче сыйныф укучылары өчен мәктәптә яңалыклар бик күп: алар белем алуның яңа баскычына күтәрелде.Быел алар яңа фәннәр өйрәнә башлады. Мәктәптә аларга класс бүлмәсен җыештыру, мәктәп буенча дежур тору йөкләнелде. Введенка Бистәсе төп гомуми белем бирү мәктәбенең бишенче сыйныфы укучылары өчен бик күп шатлык: яңа сыйныф бүлмәсе, яңа җиһазлар, яңа сыйныф җитәкчесе, яңа укытучылар... Укуыгыз уңышлы, куанычлы һәм дусларыгыз күп булсын, бишенчеләр!

01.09.2014
Белем көне
Введенка Бистәсе төп гомуми белем бирү мәктәбендә бүген Белем көне. Бәйрәм тантанасына матур итеп киенгән укучылар, аларның ата-аналары, укытучылар җыелды. Бәйрәмне алып баручылар Мария Титкова, Мишагина Регина һәм Нурмухаметова Алия килгән кунакларны бәйрәм белән котлады, күңелле бәйрәм прогрпммасын күрсәттеләр. Мәктәп директоры Никифоров Сергей Петрович тантананы ачып, сүзне Введенка Бистәсе авыл җирлеге башлыгы Дмитрий Морозовка бирде.Бәйрәм тантанасында катнашучы Югары Ослан районының хәрби комиссариаты бүлеге начальнигы Рөстәм Азгарович Шакиров укучыларны, ата-аналарны һәм укытучыларны бәйрәм белән котлады, быел тәүге тапкыр мәктәпкә килүче беренче сыйныф укучыларына истәлекле бүләкләр тапшырды.Бәйрәм мәктәп укучыларының “Минем кече Туган җирем” дип аталган берләштерелгән сыйныф сәгатендә дәвам итте, укучыларның ата-аналары өчен яңа уку елының беренче җыелышы оештырылды. Берләштерелгән сыйныф сәгатендә укучылар “Введенка Бистәсе – безнең кече Туган җиребез” дип аталган презентация карадылар, сыйныф җитәкчесе Тяганова Валентина оештырган әңгәмәдән соң, бергәләп шул темага зур коллаж ясадылар.

20.08.2014
Иптәшләрчә очрашу
16 август көнне Введенка Бистәсе төп гомуми белем бирү мәктәбе футбол кырында иптәшләрчә очрашу булды. Коми республикасының Ухта шәһәреннән футбол сборларында катнашучы спорт мәктәбе футболчылары командасы Введенка Бистәсендә эшмәкәр Сабитовның кунакханәсендә тукталып ял иткәндә Введенка Бистәсе мәктәбенең физкультура укытучысы Рамис Миначев аларга иптәшләрчә очрашу тәкъдим итте. Футболчылар тәкъдимне кабул итте. Күп еллар буе футбол белән шөгыльләнүче бу команда өчен авыл мәктәбе футболчылары яхшы уенчылар булды. Уен 8:4 исәбе белән, кунаклар командасы җиңүе белән тәмамланды. Очрашу ике команданың да спорт сөючеләрендә кәнагатьләнү калдырды, Введенка Бистәсе футбол командасы спортчылары өчен җитди тәҗрибә мәктәбе булды.

12.08.2014
«Сайдашстан»да кунакта
9нчы август көнне Введенка Бистәсе төп гомуми белем бирү мәктәбе укытучылары Югары Ослан районының Кызыл Байрак авылында кунакта булдылар. Татар профессиональ музыкасына нигез салучы композитор Салих Сәйдәшев иҗадына багышланган бу бәйрәмне быел Татарстан Республикасы мәдәният Министрлыгы җитәкчеләре оештырган.Татарстанның гаҗәеп матур почмагында – Югары Осланның Кызыл Байрак авылында талантлы композитор гаиләсе белән җәйләрен ял иткән, яңа әсәрләрен тудырырга илһам тапкан урында истәлек ташы – стелла куелган 2000нче елдан бирле ел саен музыка бәйрәме уздырыла.Татар халкы гына түгел, башка барлык халык яратып тыңлаган музыка табигатьнең гүзәллеге белән бергә кушылып яңгырый, музыка сөючеләрнең күңелләрен дулкынландыра. Композиторның якты истәлегенә багышланган музыка осталары башкарган җырлары, татар дәүләт драма театры артистлары чыгышлары Салих Сәйдәшев бәйрәмгә килүче халык өчен зур бүләк булды.

06.08.2014
Яңа уку елын башларга мәктәп әзер!
4нче август көнне Введенка Бистәсе төп гомуми белем бирү мәктәбендә Югары Ослан районы Башкарма комитеты җитәкчесе урынбасары Вилен Касимов җитәкчелегендәге мәктәпләрнең яңа уку елын башларга әзерлеген тикшерүче комиссия булды. Җәйге каникул вакытында мәктәптә шактый эш башкарылган: мәктәп директоры Сергей Никифоров җитәкчелегендә мәктәп тирәсендә гөрләп чәчәкләр үстерелгән, мәктәпнең тәрәзәләре чистартылган, коридор диварлары юылган, икенче катка менә торган баскыч яңартып буялган. Мәктәп бакчасында да тәртип: мәктәп тирәсе чистартылган, түтәлләрдә кишер, суган, кәбестә, татлы борыч, кыяр, бәрәңге үсә.Мәктәп яңа уку елын башлап җибәрергә әзер!

29.07.2014
Мәктәп яңа уку елына әзерләнә
Барлык мәктәпләрдәге кебек, Введенка Бистәсе төп гомуми белем бирү мәктәбендә дә яңа уку елына әзерлек эшләре бара. Эшчеләр мәктәпнең балалар бакчасына керү секторын ремонтлыйлар, алар бүген диварларны сайдинг белән тышлау эшләрен башкара. 9нчы сыйныф укучысы Владик Мишагин мәктәп тирәли үлән чабу белән мәшгуль. Мәктәп яны кишәрлегендә укучылар яшелчә түтәлләрен чүп үсемлекләреннән арындыралар. Укытучылар класслардагы тәрәзәләрне юды, бүлмәләрне җыештырды. Өлкәннәргә булышырга килгән укучылар мәктәпне җыештыручылар белән коридордагы диварларны юдылар. Яңа уку елы башланырга шактый вакыт бар әле, тик эшлисе эшләр дә күп, шуңа күрә тырышырга кирәк.

23.07.2014
Котлыйбыз!
Бүген Введенка Бистәсе төп гомуми белем бирү мәктәбендә зур бәйрәм. Утыз ел буе директорлык вазыйфасын башкаручы Сергей Никифоровка 55 яшь тулды. Юбилярны Введенка Бистәсе авыл җирлеге башкарма комитеты җитәкчесе Дмитрий Морозов, Югары Ослан районы башлыгы урынбасары Вилен Касимов котлады. Юбилярны укучыларның ата-аналары исеменнән котлап ата-аналар комитеты әгъзалары уңышлы хезмәте өчен аңа чиксез рәхмәтләрен һәм матур теләкләрен җиткерделәр.

16.07.2014
Бакчада кызу эш вакыты
Һава торышының чын җәйгечә кызу вакыты. Бакчада эш күп чак: карлыганнар, җиләкләр өлгерде, чияләр пешеп тора. Яшелчәләргә көн саен су сибәргә, төпләрендәге җирне йомшартырга кирәк. Бу атнада Введенка Бистәсе төп гомуми белем бирү мәктәбе кишәрлегендә Никита Сладкин һәм Искәндәр Зарипов аеруча тырышып эшләделәр. Көннең кызуына кадәр чәчәк һәм яшелчә түтәлләренә су сиптеләр, чүп утадылар. Бүген икенче кат кәбестәнең төбенә өйделәр. Яңа уку елы башлауга мәктәптә әзерлек эшләре бара: Румия Семерханова, Әлфия Бегомутдинова һәм Мария Титкова икенче катка менү баскычын яңартып буядылар, спорт залында да ремонт эшләре бара.

10.07.2014
Гаилә көне
8 июль - Гаилә көне. Быел бу бәйрәмне Введенка Бистәсендә аеруча зурлап оештырдылар, чөнки бәйрәмдә Югары Ослан районы башлыгы Марат Зиатдинов, районның ЗАГС бүлеге җитәкчесе Наталья Кадырова катнашты. Гаилә бәйрәменең иң кадерле кунаклары – уртак гаилә корып 40 ел гомер кичерүче Алексеевлар гаиләсен котларга авылның бар халкы җыелды. Югары Ослан районы башлыгы Марат Зиатдинов Алексеевлар гаиләсен юбилей белән котлап тугрылык медале, истәлекле бүләк тапшырды, гыйбрәтле гаилә башлыкларына җылы тәбрикләү сүзләрен җиткерде. Бәйрәм программасын алып баручылар - Введенка Бистәсе төп гомуми белем бирү мәктәбе укытучылары Марат Нуруллин һәм Әлфия Бегомутдинова әзерләгән презентация ярдәмендә бәйрәм кунакларын бүген лаеклы ялда булсалар да тынгы белмәс педагоглар Алексеев Александр Николаевич һәм Галина Федоровна Алексееваның тормыш юлы белән таныштырдылар. Авылдашлар илебезнең барлык гаиләләре үрнәк алырлык бу гаилә белән горурлана: аларның олы йөрәкләре һәм балаларга булган чиксез мәхәббәт үзләренең ике баласы янына тагын дүрт ятимне сыйдырган, аларга да ата-ана җылысы биреп тәрбияләгән.Күп еллар авыл мәктәбендә эшләү дәверендә Алексеевлар укыткан укучыларның ата-аналары исеменнән котлаучы Зариповлар гаиләсе Алексеевларга чиксез рәхмәтен белдерде, алтын һәм тагын да олырак туйларын да бергә каршыларлык , озын гомер, сәламәтлек һәм бәхет теләде.Бәйрәмдә катнашучы район мәдәният йорты хезмәткәрләренең искиткеч матур концерт номерлары авыл халкының күңеленә хуш килде.Гаилә – җәмгыятебезнең иң әһәмиятле нигезен тәшкил итүче төп өлеше, гаилә бәйрәме оештыру илебездәге гаиләләрнең ныгыуына, төзек һәм тотрыклы булуына китерсен!

04.07.2014
Утрауга сәяхәт
3нче июль көнне Введенка Бистәсе төп гомуми белем бирү мәктәбе укучылары һәм укытучылар коллективы елга аркылы гына урнашкан Свияжск утравында булды. Бу сәяхәтне оештыручы – мәктәп директоры Сергей Никифоров транспорт биреп торучы күршеләребезгә – стендка ату комплексы җитәкчесе С.И.Деминга зур рәхмәтен белдерә. Экскурсияне алып баручы - мәктәбебездә күп еллар тарих һәм җәмгыять белеме укытучы Алексеев Александр Николаевич үзенең кабатланмас һәм гаять мавыктыргыч сөйләме белән дан тоткан тирән белемле экскурсовод. Реставрациядән соң утрау искиткеч үзгәргән: машиналарда үтәрлек яхшы юл булдырылган, утрау буйлап җәяү сәяхәт итү юлларына асфальт түшәлгән, тарихи биналар яңартылган, иске йортлар ремонтланган, бик күп заманча яңа йортлар төзелгән, сәүдә һәм ял итү объектлары булдырылган. Экскурсоводыбызның утрау белән бәйле һәр вакыйганы тасвирлап сөйләвен тыңлый-тыңлый, утраудагы тарихи урыннарны карап йөри торгач вакыт узганы сизелмәде дә. Утрауда сәяхәт кылучы кунакларга яхшылап ял итәрлек барлык шартлар тудырылган. Бу чарадан һәркем матур хатирәләргә баеп, күңелле ял итеп һәм бик канәгать булып калды.

27.06.2014
Мәктәптә Сабантуй!
Эшләреңнең барын куй,
Бүген бездә Сабантуй.
Тизрәк йөгер мәйданга,
Бәйрәм башлана анда!
27нче июнь көнне Введенка Бистәсе төп гомуми белем бирү мәктәбе укучылары, балалар бакчасында тәрбияләнүчеләр, аларның ата-аналары, кунаклар мәктәп янындагы мәйданга җыелды. Татар теле һәм әдәбияты укытучысы Фщридщ Зарипова һәм физкультура укытучысы Рамис Миначев оештырган бу чара ел саен, уку елы тәмамланып, 9нчы сыйныф укучылары имтиханнарны тапшырып аттестат алгач, мәктәп бакчасында язгы кыр эшләре тәмамлангач уздырыла.Сабантуйны мәктәп директоры Сергей Никифоров ачты, уку елының тәмамлавы белән котлады, чыгарылыш сыйныф укучыларына сабантуй бүләкләре тапшырды.Бәйрәмдә Введенка Бистәсе авыл җирлеге башлыгы Дмитрий Морозов катнашты, ул укучыларны бәйрәм белән котлады, матди ярдәм бирүче авылдашларга рәхмәтен белдерде. Башта укучылар әзерләгән концерт булды, аннан соң Сабантуйны алып баручы Борзенко Кристина һәм Зарипов Искәндәр ярышлар башлануын игълан иттеләр: бүрәнәдә капчык белән сугышу, авызга йомыркалы кашык кабып йөгерү, велокросс, капчык киеп узышу, көянтәдә сулы чиләкләр күтәреп узышу, чүлмәк вату һәм башкалар.Бәйрәмгә килгән һәр бала аларның ата-анасы теләгән ярышларда катнашып сабантуй бүләкләре алды, 2014нче елгы мәктәп сабантуеннан барысы да канәгать булып калды.

24.06.2014
Мәктәп бакчасында кенче тапкыр чәчү
Озак вакыт яңгыр булмаганлыктан, җирдәге дым кишер орлыкларына тишелергә җитмәде. Яңгырлар явып китсә дә, түтәлләрдә кишер җитәрлек тишелеп чыкмады. Шуңа күрә, бу атнада участокта җаваплы укытучы Флюра Лысева җитәкчелегендә укучылар кишерне яңадан чәчтеләр. Мәктәп бакчасында эш бик күп. Балалар чәчәк түтәлләренә, кәбестәләргә су сибәләр, чүп утыйлар. Бу атнада иң тырышып эшләүче укучы – дүртенче сыйныфны тәмамлаучы Дима Попроцкий.

23.06.2014
Ниһаять, аттестатлы булдык!
Көткән чакта озак тоела. Менә ниһаять, имтиханнар тәмамланып нәтиҗәләре дә билгеле булды. Введенка Бистәсе төп гомуми белем бирү мәктәбен быел ике укучы тәмамлады: Борзенко Кристина һәм Галямов Александр. Мәктәптә зур тырышлык белән тугыз ел укучы Кристина моңа бик шат, исәбе - Казанда укытучылыкка укырга керү. Тантаналы рәвештә беренче рәсми документны аларга мәктәп директоры Сергей Петрович Никифоров тапшырды. Мәктәп директорының укыту һәм тәрбия эшләре буенча урынбасары Анна Михайловна Ширяева, сыйныф җитәкчеесе Фәридә Зарипова укучыларга котлау сүзләре һәм якты теләкләрен җиткерделәр. Үз чиратында, мәктәпне тәмамлаучылар исеменнән Борзенко Кристина укытучылар коллективына рәхмәтен һәм укуын тәмамларга тырышачагын белдерде. Хәерле юл, сезгә, балалар!

11.06.2014
Күптән көтелгән яңгыр безгә дә килеп җитте!
Һава торышының коры булуына күрә, түтәлләрдә дым җитми. Мәктәп яны кишәрлегендә балалар күпме тырышып сипсә дә, яңгырга җитми шул. Бүген, 11 июнь көнне Введенка Бистәсе төп гомуми белем бирү мәктәбе коллективы яңгырлы һава торышына шатланып кәбестә утыртты.Технология укытучысы Сергей Никифоров эшне бик оста оештырган: ир-егетләр кәбестәләргә чокырчыклар казып тора, укытучы апалар туфракка черемә өсти, укучылар агач көле һәм ком салып бара, кемдер су сибә, кемдер кәбестә үсентеләрен утырта.Ел саен мәктәп яны бакчасында утыртырга кәбестә үсентеләрен татар теле укытучысы Фәридә Зарипова үстереп бирә. Бергә эшләү – күңелле дә, тиз дә. Эшне бетереп кереп, чәй эчәргә җыенганда шыбырдап яңгыр ява башлады, димәк, кәбестә быел да уңар!

1.05.2014
Без инде хәзер зурлар - башлангыч мәктәпне тәмамладык!
Введенка төп гомуми белем бирү мәктәбендә зур бәйрәм – 4нче сыйныф укучылары башлангыч мәктәп белән хушлашты, башлангыч мәктәпне тәмамлау турында диплом һәм истәлекле бүләкләргә лаек булдылыр. Быел бишенчегә биш укучы өстәлде: яңгыравык тавышлы футболчы Борзенко Анастасия, тыйнак һәм бик акыллы Нурмухаметова Алия, үткен һәм уйлап табучы Морозов Кирилл, футбол яратучы һәм тырыш Попроцкий Дмитрий, чын хуҗабикә һәм оста капкачы Сладкина Анна. Укытучылары Масалия Маликова җитәкчелегендә алар бик матур чыгыш әзерләгәннәр. Бәйрәмдә укучылар да аларның ата-аналары да беренче укытучылары Наталья Михайловнага һәм аларны 4 ел буе укыткан барлык укытучыларга рәхмәт сүзләрен җиткерделәр. Һәрвакыттагыча, әти-әниләр балаларны бәйрәм табынына чакырды, тәмле ризыклар белән сыйлады, укудагы беренче зур җиңү белән котлап, сәламәт һәм бәхетле булуларын теләделәр.

31.05.2014
Мәктәптә ата-аналар җыелышы
Тагын беру ку елы артта калды. 30нчы май көнне Введенка Бистәсе төп гомуми белем бирү мәктәбендә укучыларның ата-аналары җыелды. Җыелышта каралган сорауларның иң мөһиме -уку елы нәтиҗәләре. Укыту һәм тәрбия эшләре мөдире Анна Ширяева ата-аналарга ел нәтиҗәләрен җиткерде: мәктәп укучыларының 12 се уку елын “4”ле һәм “5”ле билгеләренә, бер укучы –Мишагина Регина гел “5”легә тәмамлады. Мәктәп директоры Сергей Никифоров үз чыгышында мәктәп яны участогында укучылар башкарган эшләр белән таныштырды, укучыларны җирдә эшләргә кызыксындыруның әһәмияте турында , җәйге каникулда укучылар белән мәктәп яны кишәрлегендә башкарыласы эшләр турында сөйләде, ата-аналарны кызыксындырган сорауларга җавап бирде. ОБЖ укытучысы Николай Александров ата-аналар белән җәйге каникул вакытында укучыларның сәламәтлеге иминлеген саклап калу өчен үтәлергә тиешле куркынычсызлык кагыйдәләрен кабатлады, ата-аналарның балалар сәламәтлеген саклауда һәрвакыт бурычлы булуларын искәртте.

28.05.2014
Язның бер көне елны туендыра.
Язның бер көне елны туендыра. 27нче май көнне Введенка Бистәсе төп гомуми белем бирү мәктәбе коллективы уку елында мәктәп ашханәсендә туклану өчен үстерергә бәрәңге утыртты. Бәрәңге – ашханәдә иң күп кулланучы яшелчәләрнең берсе. Технология укытучысы Сергей Никифоров җитәкчелегендә укучылар көн саен мәктәп бакчасында чәчү-утырту эшләрендә катнашалар, чәчәкләргә су сибәләр.Авыл мәктәбендә укучы балалар бу эшләрдә катнашып, кечкенәдән җирне эшкәртү һәм җирдә яшелчә үстерү серләренә өйрәнә.

17.05.2014
Матур булсын!
17нче май көнне Введенка Бистәсе төп гомуми белем бирү мәктәбе укучылары технология укытучысы Сергей Никифоров җитәкчелегендә мәктәп алдында чәчәкләр түтәле ясады. Һәркемгә эш җитәрлек булды: малайлар түтәлләрдә чокырчыклар ясап торды, су ташыдылар, кызлар берьеллык чәчәк үсентеләре н чокырчыкларга утыртып су сиптеләр. 6-9нчы сыйныф укучылары укытучылары белән бергәләп бик тырышып, матур түтәлләр булсын дип эшләделәр: мәктәпкә кергән җир матур булсын, җәй буе чәчәк атып күңелле булып торсын! Менә шундый дәресләр аша балаларда хезмәт сөючәнлек, матурлык булдыруга омтылыш тәрбияләнә дә!

15.05.2014
15нче май көнне Введенка Бистәсе төп гомуми белем бирү мәктәбе укучылары авыл клубы мөдире Анастасия Сладкина тарафыннан оештырылган Гаилә бәйрәмендә катнаштылар. Гаилә бәйрәмендә барлык тамашачыны Югары Ослан муниципаль районы социаль яклау бүлеге хезмәткәрләре бәйрәм белән котлады. Укучылар һәм укытучылар әзерләгән концерттан соң рәсем бәйгесе үткәрелде. Асфальтта төсле акбурлар белән ясалган “Безнең гаилә” дип аталган рәсем бәйгесе җиңүчеләренә истәлекле бүләкләр тапшырдылар. Һәр кеше өчен иң кыйммәтле байлык – аның яраткан гаиләсе. Гаиләсендә бәхетле булган кеше хезмәтендә дә уңышка ирешеп дәүләтебезгә файда китерә ала.

14.05.2014
Язның һәр көне - кыйммәт!
Бу көннәрдә Введенка Бистәсе төп гомуми белем бирү мәктәбе укучылары мәктәп янында үстерер өчен берьеллык чәчәк үсентеләре әзерләү белән мәшгуль. 6,7 сыйныф укучылары технология дәресләрендә парниктагы җирне казып йомшартты, 7,9 сыйныф укучылары парникка татлы борыч үсентеләрен күчереп утыртты. Биология укытучысы Макарова Гөлнара 8нче сыйныф укучылары белән ящикларга туфрак әзерләп, берьеллык чәчәк орлыклары чәчтеләр. Кечкенә үсентеләр тәрәзә төбендә үскән арада, укучылар мәктәп кишәрлегендә җирне әзерләп куярга тиеш. Мәктәп яны кишәрлегендә туфракны бик яхшылап ашламалыйсы бар, авыр балчыкта кишердән башка культуралар бик авыр һәм начар үсә.

13.05.2014
Узган уку атнасына йомгак.
13нче май, сишәмбе көнне Введенка Бистәсе төп гомуми белем бирү мәктәбендә линейкада узган атнага йомгак ясау булды. Мәктәпнең укыту бүлеге мөдире Анна Ширяева Җиңү көненә багышланган концерта һәм митингта катнашучы укучыларга, укытучыларга , оештыручы Мария Титковага администрация исеменнән рәхмәтен белдерде. Анна Михайловна районда уздырылган фестиваль-бәйге җиңүчеләре Зарипов Искәндәр һәм Белов Дмитрийга район мәгариф бүлеге грамоталарын тапшырды. Алда – бик җаваплы ике атна, барлык фәннәрдән йомгаклау контроль эшләре үткәреләчәк, шуңа күрә укучыларга дәресләргә бик тырышып әзерләнү кирәклеген искәртте ул.

9.05.2014
Җиңү көне белән!
9нчы май көнне Введенка Бистәсе төп гомуми белем бирү мәктәбе укучылары һәм укытучылары коллективы, авыл халкы Бөек Ватан сугышында һәлак булган авылдашлар истәлегенә куелган һәйкәл янына җыелды. Бөек Җиңүнең 69еллыгына багышланган митингны мәктәп укучыларының ялын оештыручы Мария Титкова ачып җибәрде. Сугыш елларында тылда- илебез кырларында хезмәт итүче абый-апаларны, бәйрәмгә килгән барлык авыл халкын Введенка Бистәсе авыл җирлеге Башлыгы Дмитрий Морозов бәйрәм белән котлады, хезмәт ветераннарына, тылда хезмәт итүчеләргә бүләкләр тапшырды. Митингтан соң барысы да авыл клубында бәйрәм концертын карады, концерттан соң тылда хезмәт итүче авылдашларны кунаклар комплексында бәйрәм өстәлләрендә тәмле ризыклар белән сыйладылар, алар сугыш елларында популяр булган җырларны тыңлап, яшьлек хатирәләре белән уртаклаштылар.

7.05.2014
7нче май көнне Введенка Бистәсе төп гомуми белем бирү мәктәбендә укучылар Бөек Ватан сугышы елларында хезмәт иткән Земскова Александра Андреевна һәм Тарасова Екатерина Филипповна белән очрашу булды. Бөек Җиңүнең 69еллыгын каршылаучы бу ветераннар укучыларга үзләренең балачагы һәм сугыш елларына туры килгән яшьлек еллары турында сөйләделәр. Александра Андреевна - сугышның беренче көннәрендә Украинадан эвакуацияләнгән балаларның күбесе кебек Казанга эләгә, дары заводының ярдәмче хуҗалыгында Введенка Бистәсендә тракторчы булып эшли . Екатерина Филипповна Тәтеш техникумында укытучылыкка укып, 52 ел Югары Ослан районы мәктәпләрендә балалар укыта. Укучыларның барлык сорауларына матур итеп җавап бирделәр алар, илебезгә файдалы булыр өчен аларга тырышып укырга, хезмәт сөяргә киңәш иттеләр. Балалар ветеран укытучы Екатерина Филипповнаның хәтеренә сокланды: 85 яшендә ул һәр укучысын хәтерли, искиткеч матур сөйли. Екатерина Филипповна балаларны яшьлек еллары турында шигырь сөйләп шаккатырды.

06.05.2014
Бәйге-фестивальнең йомгаклау концертында
6нчы май көнне Печище төп гомуми белем бирү мәктәбендә татар телендә балалар иҗаты район бәйгесе-фестиваленең йомгаклау концерты булды.Введенка Бистәсе төп гомуми белем бирү мәктәбеннән татар теле һәм әдәбияты укытучысы Зарипова Фәридә, 6нчы сыйныф укучысы Мишагина Регина һәм 7нче сыйныф укучысы Зарипов Искәндәр катнашты. Татар балалары арасында беренче урын алучы Искәндәр Шәүкәт Галиевнең “Озак яшәүнең сере” исемле шигыре белән чыгыш ясады. Концертта катнашучы Югары Ослан районы укучылары тамашачыларны үзләренең искиткеч матур чыгышлары белән шатландырды. Киләчәктә бу мөһим чара һәр ел саен үткәреләчәк,- диде төп оештыручы,РМҮ белгече Гөлгенә Давлетшина.

05.05.2014
5нче май көнне Введенка Бистәсе төп гомуми белем бирү мәктәбендә ата-аналар җыелышы булды. 6нчы сыйныф җитәкчесе Әлфия Бегомутдинова укучыларның ата-аналары белән “Яшүсмерләрнең уку хезмәте.6нчы сыйныф укучыларыны укытуда ата-аналар ярдәме” дигән темага сөйләшү оештырды.Сыйныф җитәкчесе һәр укучының дәресләргә йөреше, өлгереше турында мәгълүмат бирде, балаларның яшь үзенчәлекләре турында сөйләде. Җыелышта төп фәннәрне алып баручы укытучылар катнашты, ата-аналарны борчыган сораулар каралды. Бу яшьтәге укучы балалар өчен мөһим булган көндәлек режимны үтәү, дөрес туклану, дәресләр әзерләүне вакытында оештыруда ата-аналар ярдәме бик кирәк.

29.04.2014
29нчы апрель көнне Введенка Бистәсе авыл җирлегендә чираттагы авыл кешеләрен кабул итү көне оештырылды. Авыл җирлеге Башлыгы Дмитрий Морозовка Введенка Бистәсе төп гомуми белем бирү мәктәбенең математика укытучысы – яшь белгеч Марат Нуруллин мөрәҗәгать итте: аңа бүлеп бирелгән җир кишәрлегенә адрес бирелүен сорады.

28.04.2014
28нче апрель көнне, Елизаветино авылы кешеләре Введенка Бистәсе авыл җирлегенә хәбәр итүенчә, кибет янында үскән агач башы электр үткәргечләргә тиеп янгын чыгу куркынычы тудыра. Авыл җирлеге Башлыгы эшнең җитдилеген аңлап, тиз арада электрчылар оешмасына агачны кисәргә, электр үткәргечне тарттырырга кирәклекне хәбәр итте.

26.04.2014
Елизаветино авылында яшәүчеләр белән очрашуга Югары Ослан муниципаль районы башлыгы урынбасары Сергей Осянин һәм Введенка Бистәсе авылы җирлеге башлыгы Дмитрий Морозов килде. Елизаветино авылында яшәүчеләр өчен иң зур мәсьәлә – авылдан трассага кадәр юл салу.Бүгенге көнгә кадәр авыл халкы юлсызлыктан тилмерә: аз гына яңгыр явып үтсә дә, балчык юлдан машиналар үтә алмый. Авылдашлар үзләре дә тик тормый: үзара акча җыеп юл өстенә вак таш җәяргә тырышалар. Авылда яшәүчеләр саны аз булганлыктан бу зур эшне үзләре генә башкарып чыга алмыйлар, шуңа күрә халык башкарма комитеттан ярдәм көтә.

26.04.2014
«И туган тел, и матур тел, әткәм-әнкәмнең теле,
Дөньяда күп нәрсә белдем, син туган тел аркылы..”
26нчы апрель – татар халкының бөек шагыйре Габдулла Тукайның туган көне. Введенка Бистәсе төп гомуми белем бирү мәктәбе укучылары бу көнгә шигырь бәйрәме әзерләделәр. Татар теле һәм әдәбияты укытучысы оештырган бу бәйрәмгә һәр укучы берәр әсәрне өйрәнеп куйды. Иә беренче итеп, сигезенче сыйныф укучылары Белов Диманы тыңладылар, ул Тукайның биографиясен татар телендә сөйләде, ә Мишагин Владик үзе әзерләгән презентацияне күрсәтте. Укучылар Г. Тукайның “Туган тел”, “Карлыгач”, “Безнең гаилә” һәм башка шигырьл ике телдә сөйләде, ә 6нчы сыйныф укучылары сәхнәләштерелгән өзекне уйнап күрсәтте.

26.04.2014
Бүген, 26нчы апрель көнне Введенка Бистәсе төп гомуми белем бирү мәктәбе укучылары һәм укытучылар Югары Ослан муниципаль районында оештырылган авыл урамнарын җыештыру, агачлар утырту өмәсендә катнашты. 7-9 нчы сыйныф укучылары һәйкәл янында агачлар утыртты, 4-6нчы сыйныф укучылары үзәк урамны чүп-чардан арындырырга булышты. Укучылар бу өмәдә бик теләп катнаштылар, Сладкина Анна, Борзенко Настя, Зарипов Искәндәр аеруча тырышып эшләде. Авыл урамнары чистарып матурланып калды. Укучыларның әти-әниләре дә бүген авыл җирлеге Башкарма комитеты оештырган өмәдә эшләде.

23.04.2014
23нче апрель көнне Введенка Бистәсе төп гомуми белем бирү мәктәбе укучылары авыл китапханәсендә кунакта булды. “Библионочь» исемле акция рамкаларында китапханәче Елена Суханова оештырган бу чарада мәктәпнең башлангыч сыйныфлары укучылары катнашты. ”Без яшәгән дөнья» циклыннан Җир көненә багышланган файдалы әңгәмәдә укучылар бик теләп җаваплар бирде, кызыклы викторинада катнашты.Җирдәге тереклекне саклауда һәр кеше, шулай ук укучылар да үз өлешен кертергә тиеш. Табигатьне саклау - кешеләрнең үз кулларыннан килә торган изге эш.

23.04.2014
Балалар бакчасында кунакта.
23нче апрель көнне Введенка Бистәсе төп гомуми белем бирү мәктәбенең 6нчы сыйныфы укучылары балалар бакчасында кунакта булды. Рус телендә сөйләшүче укучыларның 6нчы сыйныф программасы буенча татар әдәбияты дәресләрендә Т.Миңнуллинның “Авыл эте Акбай” исемле пьесасын өйрәнәләр.Укучылар шул әсәрдән бер өзекне сәхнәләштереп балалар бакчасындагы нәни тамашачыларга күрсәттеләр.Беренче тапкыр чыгыш ясаганлыктан, артистлар бик дулкынланды, ә шулай да тамашачыларга бүләк бик ошады. Тәмлетамакның Регина, ә Акбайның Дима икәнлеген, әлбәттә, аңлады нәниләр. Үзебезнең дүрт аяклы дусларыбызны яратырга, ашатырга һәм уйнатырга кирәклекне дә беләләр икән балалар! Татар теле укытучысы Фәридә Зарипова фикеренчә, укучыларның рольләргә кереп уйнавы – тел өйрәнүгә кызыксындыруның бик отышлы ысулы.

21.04.2014
21нче апрель көнне Введенка Бистәсе төп гомуми белем бирү мәктәбе укучылары рәсем бәйгесендә катнашты. Оештыручы – рәсем сәнгате укытучысы Мария Титкова. Укучылар ирекле темага рәсем ясады, һәркем үзе теләгән алымны кулланып сайлаган теманы ачарга тырышты. Укучыларның эшләре мәктәп диварларын бизәп тора: мәктәпкә килүчеләргә дә укучыларның үзләренә дә бик күңелле.

21.04.2014
21нче апрель көнне Введенка Бистәсе төп гомуми белем бирү мәктәбенең волонтерлары Бөек Ватан сугышы елларында һәлак булган авылдашлар истәлегенә куелган һәйкәл тирәсен җыештырды.Авылыбыз уртасында урнашкан бу матур һәйкәл тирәсен озын кыштан соң кардан арынган җир өстендә җыелган чүп-чардан, үткән елгы коры үләннән чистартты алар. Җитәкчеләре Фәридә Зарипова укучыларның чын күңелдән эшләвен күреп бик шат: 9нчы сыйныф укучысы Саша Галямов, 8нче сыйныфтан Владик Мишагин һәм 7нче сыйныф укучысы Искәндәр Зарипов эшне бик тиз һәм бердәм булып, җиренә җиткереп эшләделәр. Һәйкәл тирәсендәге чәчәкләр түтәле, сукмаклар чип-чиста булып калды. Һәйкәл янына килгән кешенең кәефе төшәрлек булмасын! Барлык кешеләр өчен бик әһәмиятле булган, бу кечкенә генә эшләреннән алар, арысалар да канәгать булып кайттылар.

19.04.2014
19нчы апрель көнне Введенка Бистәсе төп гомуми белем бирү укучылары һәм укытучылары язгы өмәдә катнашты. Дәресләрдән соң классларга мәктәп янын җыештыру-чистарту участоклары билгеләнде. Сыйныф җитәкчеләре белән берлектә укучылар тырышып үзләренә йөкләнгән чистарту эшләрен башкарды. Мәктәпкә керү һәм мәктәп яны территориясендә кыш буе кар астында җыелып килгән чүп-чарны капчыкларга тутырып махсус контейнерларга ташыдылар.

16.04.2014
16нчы апрель көнне Введенка Бистәсе авылы мәдәният йортында авылда яшәүче халыкның кул эшләреннән торган иҗади күргәзмә булды.
Күргәзмәгә мәктәп укучылары һәм укытучылары, авылда яшәүчеләр буш вакытта яратып шөгыльләнгән мавыктыргыч рәсем сәнгате әсәрләрен, төрле кул эшләре хезмәтләрен тәкъдим итте. Авыл мәдәният йорты директоры А. Сладкина, мәктәп директоры вазыйфасын башкаручы А.Ширяева, авыл җирлеге башлыгы Д.Морозов җитәкчелегендә күргәзмәдә куелган барлык экспонат мәктәп укучыларының, авыл халкының игътибарын җәлеп итте. Авылда рәсем сәнгатен сөюче шактый һәвәскәр рәссам барлыгы, зәвыклы сувенир ясау осталары,бәйләүче- чигүчеләр яшәве ачыкланды. Күргәзмәгә килгән кунакларны мәктәптә сынлы сәнгать дәресләре укытучы Мария Титкова чылатылган кәгазьдә ясау техникасы белән “Кояш баюы” дип аталган рәсем ясарга да өйрәтте.

17.04.2014
17нче апрель көнне Введенка Бистәсе төп гомуми белем бирү мәктәбе укучылары һәм укытучылары техник һәм гамәли-декоратив иҗат фестиваль-күргәзмәсендә катнашты. Күргәзмәгә мәктәп укучылары һәм укытучылары буш вакытта яратып шөгыльләнгән мавыктыргыч рәсем сәнгате әсәрләрен, төрле кул эшләре хезмәтләрен тәкъдим итте. Авыл мәдәният йорты директоры А. Сладкина, мәктәп директоры вазыйфасын башкаручы А.Ширяева, авыл җирлеге башлыгы Д.Морозов җитәкчелегендә күргәзмәдә куелган барлык экспонат мәктәп укучыларының, авыл халкының игътибарын җәлеп итте. Авылда рәсем сәнгатен сөюче шактый һәвәскәр рәссам барлыгы, зәвыклы сувенир ясау осталары,бәйләүче- чигүчеләр яшәве ачыкланды. Күргәзмәгә килгән кунакларны мәктәптә сынлы сәнгать дәресләре укытучы Мария Титкова чылатылган кәгазьдә ясау техникасы белән “Кояш баюы” дип аталган рәсем ясарга да өйрәтте.

16.04.2014
16нчы апрель көнне Югары Ослан урта мәктәбендә район мәктәпләре укучылары катнашында татар җыры һәм шигырьләре фестивале булды. Введенка Бистәсе төп гомуми белем бирү мәктәбеннән 8нче сыйныф укучысы Белов Дима һәм 7нче сыйныф укучысы Зарипов Искәндәр катнашты. Укучыларга композитор Сара Садыйкова иҗаты буенча Югары Ослан мәктәбе укучылары әзерләгән программа тәкъдим ителде. Фестивальне РМҮ белгече Г.И.Давлетшина ачып җибәрде. Укучыларга бәйрәм дә, бер-берсенең матур чыгышлары да бик ошады.

15.04.2014
15нче апрель көнне Введенка Бистәсе төп гомуми белем бирү мәктәбенең 2нче һәм 9нчы сыйныфларында укучылар сынлы сәнгать дәресләрендә яңа ысул –гравюра ысулына өйрәнделәр. Рәсем сәнгате укытучысы Мария Титкова укучыларга башта эш үрнәкләре күрсәтте, яңа төр эш алымын аңлатты.Укучыларга яңа эш ысулы ошады һәм алар хезмәтләренең беренче “җимешләрен” күргәзмәгә куярга ризалыкларын белдерде.

11.04.2014
11нче апрель көнне Введенка Бистәсе төп гомуми белем бирү мәктәбенең башлангыч сыйныфлары укытучысы Мария Титкова район укытучылары семинарында булды. Татар Бурнашы урта мәктәбендә оештырылган семинарда укытучылар “Белем бирүдә федераль стандартларны тормышка ашыруда эшчәнлекле методның дидактик системасы” темасына дәресләр карады, түгәрәк өстәл артында фикер алышты. Семинарга килгән һәр укытучы үзенә бик кирәкле, файдалы мәгълүматлар алды.

4.04.2014
4нче апрель көнне Введенка Бистәсе төп гомуми белем бирү мәктәбенең башлангыч сыйныф укучылары берләштерелгән сыйныф сәгатенә җыеды. Башлангыч сыйныфлар укытучысы Мария Титкова оештырган бу сыйныф сәгате - тешләр сәламәтлеге турында. Укучылар тешләрне саклауның мөһимлеге, кеше организмы өчен тешләрнең роле турында , аларны ничек чистартырга кирәклекне тыңладылар һәм тәкъдим ителгән макетта тешләрне чистартып та карадылар.Мондый кызыклы һәм файдалы сыйныф сәгате барлык укучы күңеленә хуш килде.

2.04.2014
Яз җитү белән юлның бик күп җимерелгән, төзексез җирләре ачыла. Введенка Бистәсендә дә юлны ремонтлау эшләре дәвам итә. Трассадан авылга илтүче юл авыл җирлегендә яшәүчеләр машинада тоткарлыксыз йөрсен өчен төзек булырга тиеш, шуның өчен эшчеләр бу көннәрдә тырышып юлда эшли.

2.04.2014
2нче апрель көнне Введенка Бистәсе төп гомуми белем бирү мәктәбендә уку елының соңгы чиреге башланды.Иртәнге сигездән беренче дәрескә кадәр укучылар сыйныф сәгатьләренә җыелды. Өченче дәрестән соң мәктәпнең гомуми линейкасында укучылар шатлыклы яңалык белделәр: Введенка Бистәсе мәктәбе укучылары Зарипов Искәндәр һәм Мишагина Регина “Великие битвы в истории” дип аталган Россия күләмендәге викторинада җиңү яулаган. Директор вазыйфасын башкаручы Анна Ширяева аларны һәм тарих укытучысы Марина Маркелованы җиңү белән котлады һәм IIIдәрәҗә Дипломнар тапшырды. Барлык укучыларның да уку елының соңгы чиреген уңышлы тәмамлауларын теләде.

14.02.2014
«Тере классика» бәйгесенең муниципаль этабында.
14нче март көнне районның Үзәк китапханәсендә «Тере классика» бәйгесенең муниципаль этабы узды. Бәйгедә Югары Ослан районының алты мәктәбеннән унөч укучы оста итеп прозаик әсәрләрне уйнап күрсәтүдә ярышты. Бу бәйге һәр елны алтынчы сыйныф укучылары арасында оештырыла. Укучылар төрле язучыларның үзләренә ошаган әсәрләрен ятлаганнар. Бәйгедә Введенка Бистәсе мәктәбеннән быел өч укучы катнашты: Мишагина Регина, Борзенко Дима һәм Сладкин Никита. Һәр укучы зур тырышлык белән үзләренең иҗади сәләтләрен күрсәтте. Бәйгедә катнашучы укучыларга район Үзәк китапханәсе мөдире рәхмәт хаты тапшырды.

12.02.2014
12нче март көнне Введенка Бистәсе төп гомуми белем бирү мәктәбендә футбол көне булды. Малайлар һәм кызлар бик хәрәкәтчән, ә футбол - Введенка Бистәсе укучыларының иң яраткан уены. Зур тәнәфестә һәм дәресләрдән соң физкультура укытучысы һәркөн укучыларны спортзалга футбол уйнарга чакыра.Спорт залының төзеклеге һәм матурлыгы да күңелләргә нур өстәп, спорт белән шөгыльләнергә әйдәп тора кебек.Яшүсмерләр өчен бу шөгыль аеруча файдалы, шуңа күрә мәктәп администрациясе спорт залын эффектлы файдалануга зур игътибарын юнәлдергән.

12.02.2014
12 март көнне “Яр буе Морквашы урта гомуми белем бирү мәктәбе”ндә “Иң яхшы сыйныф җитәкчесе” бәйгесенең муниципаль этабы уздырылды. Бу бәйгедә Введенка Бистәсе төп гомуми белем бирү мәктәбенең биология һәм химия укытучысы, 9нчы сыйныф җитәкчесе Макарова Гөлнара Рәисовна катнашты. Бәйгедә катнашучы сыйныф җитәкчеләре укучылар белән сыйныф сәгатьләре оештырды, абруйлы жюри әгъзалары игътибарына үзләренең эш тәҗрибәсен яктырткан презентацияләрен тәкъдим иттеләр. Тәҗрибәле, яшь һәм белемле педагог Гөлнара Рәисовна да үзенең профессиональ осталыгын күрсәтте.

14.02.2014
Введенка Бистәсе төп гомуми белем бирү мәктәбе укучылары Әфганстан сугышында катнашкан Совет солдатларын искә алу кичәсендә булдылар. Бу класстан тыш чараны укытучы Мария Титкова әзерләде. Кичәдә 4-5нче сыйныф укучылары патриотик темага җырлар башкарды, сугыш турында һәм солдатлар тормышына багышланган шигырьләр сөйләделәр. Әфганстан....9 ел, 1 ай, һәм 19 көн дәвам иткән сугыш... Әфганстан кырларында ятып калган солдатлар истәлегенә бер минут тынлык игълан ителгәч, укучыларның җитди йөзләре экранга төбәлде. Укучылар карашында сугышка нәфрәт, тыныч тормышка теләктәшлек чагылды. Яман сугыш афәте Туган илебезгә кагылмасын! Җир шарында барлык кешеләр тынычлыкта яшәсен! Сабыйларның һәм аналарның күз яшьләре түгелмәсен!

11.02.2014
Ватанны Саклаучылар көне . Введенка Бистәсе балалар бакчасында бу бәйрәмгә зур әзерлек бара: әтиләр, солдатлар турында шигырьләр, җырлар өйрәнү, спорт төрләрендә ярышуга әзерләнү. Балалар кадерле кешеләре – әтиләрен бәйрәм белән котлау, өчен нәни куллары белән бүләкләр ясыйлар, тырышып-тырышып открыткаларга матур рәсемнәр төшерәләр

29.01.2014
Введенка Бистәсе төп гомуми белем бирү мәктәбе укытучылары район спартакиадасында катнашты. Бу чара районда икенче ел оештырыла. Кышкы спартакиада программасында спорт уеннарының күп төрләре бар, һава торышының артык салкын булгынлыктан чаңгы ярышлары вакытлыча үткәрелмәде. Укытучылар өчен оештырылган кышкы спартакиаданың максаты: сәламәт яшәү рәвешен пропагандалау белән бергә мәктәп укытучыларының кышкы спорт төрләрендә осталыкларын үстерү һәм укытучылар арасында спортның бу төрләре буенча осталарны барлау.Введенка Бистәсе төп гомуми белем бирү мәктәбенең яшь укытучылары Мария Титкова һәм Альфия Бегомутдинова чыгышлары мәктәп командасы хисабына баллар өстәде.Бәйгеләр арасында укытучылар волейбол уйнады. Кышкы спартакиадада катнашучылар барысы да һәрчак яхшы кәефтә һәм сәламәт булсын!

24.01.2014
Введенка Бистәсе төп гомуми белем бирү мәктәбендә бу көннәрдә Ватанны саклаучылар көненә әзерлек бара. Укучыларның класстан тыш шөгыльләрен оештыручы Мария Титкова җитәкчелегендә балалар хоры яңа җырлар өйрәнә. Һәр укучы бала үзен чын яклаучы итеп тойсын өчен, һәр сыйныфка аерым биремнәр бирелде. Мәктәпнең волонтерлары Бөек Ватан сугышында һәлак булган якташларыбыз истәлегенә куелган һәйкәл тирәсен кардан арындырды.Атнага бер тапкыр алар ярдәмгә мохтаҗ булган өлкән яшьтәге авылдашларга чишмәдән су ташый.

23.01.2014
Билен кысып буган, - диләр.
Бигрәк тә уңган, - диләр.
Әллә каян күренеп тора
Солдатта булган, - диләр.
Введенка Бистәсендә бүген тагын бер шатлык: армия сафларында солдат хезмәтен тәмамлап, Андронов Александр авылга кайтты. Авыл халкы Сашаның матур, төз атлап урамнардан үтүен сокланып карап кала Һәм Туган илебез каршында изге бурычын үтәүче авылдашыбыз белән горурлана. Саша киләәчәктә Россия Армиясе составында контрак нигезендә хезмәт итәргә булган, шуңа күрә бераз ял иткәч ул Ульяновск өлкәсенә китеп барачак.Хезмәтеңдә уңышлар сиңа, батыр егет!

21.01.2014
Дәресләрдән соң, Введенка Бистәсе төп гомуми белем бирү мәктәбенең волонтерлар отряды авыл уртасында урнашкан һәйкәл янына килде. 1941 - 1945нче елларда Ватаныбыз азатлыгы өчен Бөек Ватан сугышында һәлак булучы сугышчылар истәлегенә куелган бу һәйкәлдә сугыш кырларына Введенка авылы җирлегеннән чыгып китүче солдатлар исемлеге саклана.Волонтерлар һәйкәлгә илтүче сукмакны һәм һәйкәл тирәсен кардан арындырдылар. Кышкы кояш һәм сагындырган салкыннан аларның битләре алсуланган, йөзләре шат. Барлык кешеләр өчен бик әһәмиятле булган, бу кечкенә генә эшләреннән алар, арысалар да канәгать калдылар. Шундый балалар булганда җир йөзендә эшләнгән бернинди яхшылык та онытылмас!

21.01.2014
Введенска Бистәсе балалар бакчасында тәрбияләнүче балалар театр турында гади мәгълүматләр алдылар. Дәрестә төрле театр биналары сүрәтләнгән рәсемнәр күрсәтелде: тышкы яктан һәм бинаның эчке күренеше. Тәрбияче Нәзирә Клычева балалар белән театрда тамаша барган вакытта һәм тәнәфестә үз-үзеңне тоту кагыйдәләрен кабатладылар. Дәрес ахырында тәрбияче балаларга курчак театры уйнатып күрсәтте.

20.01.2014
Мәктәпкә әзерлен группасы балалары математика дәресендә җиде саны төзелеше белән таныштылар. Шулай ук зур-зуррак, кечкенә-кечкенәрәк, тигез терминнары белән таныштылар. Дәрес “Ишекләр” уены белән тәмамланды.

16.01.2014
Чаңгы дәресләре башланды
Гомуми белем бирү мәктәпләре программасы буенча өченче чиректә физкультура дәресләре чаңгыда йөрү алымнарын өйрәнүгә багышланган. 16нчы гыйнварда Введенка Бистәсе төп гомуми белем бирү мәктәбенең фикультура укытучысы Рамис Миначев укучылар белән сезонны ачып җибәрде. Укучылар чаңгыда йөргәндә нинди киемнәрдә булырга кирәклеген, куркынычсызлык кагыйдәләрне истә төшерделәр. Чаңгыда йөрүнең махсус урыны - мәктәп янындагы бер чакрымлык юл.Укытучы тагын бер кат балаларга укучының дәрестәге эшчәнлеген бәяләү тәртибен һәм нәрсәгә игътибар бирергә кирәклекне аңлатты. Әлбәттә, укучылар һава торышының кышкы халәтенә кайтуына бик шат, рәхәтләнеп чанада шуып һәм чаңгыда йөреп калырга булсын!

14.01.2014
14нче гыйнвар көнне Введенка Бистәсе төп гомуми белем бирү мәктәбендә укучыларның беренче гомуми линейкасы булды. Мәктәп директоры Сергей Никифоров укучыларны уку елының өченче һәм иң озын чиреге башлану белән котлады.Уку алдынгыларын Кыш Бабайдан килгән татлы күчтәнәчләре белән бүләкләделәр һәм укучылар белән мәктәптә, сыйныф бүлмәләрендә, урамда үз-үзеңне тоту кагыйдәләрен искә төшерделәр.Бәйрәмнәр артта калды, инде сыйныф бүлмәләрендә тәртип һәм чисталык урнаштыру өчен һәр сыйныф укучыларыҗыештыру эшләрен үтәргә тиеш.

13-14.01.2014
Каникул тәмамланып, уку чирегенең беренче көннәрендә үк, Введенка Бистәсе төп гомуми белем бирү мәктәбе укучылары кәшәкә уены һәм тимераякта шуу мәйданчыгын әзерләү белән мәшгуль булды. Кышкы каникул вакытында һава торышы җылы булганлыктан, бу эшне әлегә кадәр башкарып булмаган иде.Мәктәпнең физкультура укытучысы Рамис Миначев оештырган бу чарада барлык укучылар һәм укытучылар катнашты. Яраткан уеннарын уйный торгач, хоккей коробкасы мәйданындагы юеш кар тыгызланды, уенның нәтиҗәсе - 6:6 һәм мәйдан судан боз туңдырырга әзер!

06.01.2014
Югары Ослан муниципаль районының алдынгы укучылары өчен чыршы бәйрәмендә
Введенка Бистәсе төп гомуми белем бирү мәктәбендә гел бишле билгеләренә өлгереп баручы укучы бер генә –Мишагина Регина. Регина сыйныф җитәкчесе Әлфия Бегомутдинова белән районның алдынгы һәм актив укучылары өчен оештырылган чыршы бәйрәмендә булды. Бәйрәм “Кыш бабайның югалган хәзинәләре” исемле Яңа ел әкияте белән башланды. Актерларның осталыгы, аларның гаҗәеп матур костюмнары һәм әкияти музыка тамашачыларга бик нык тәэсир итте.Укучылар үзләре дә бәйрәмнең төрле бәйгеләрдә катнаштылар: “Белем планетасы”, “Сәнгать планетасы” һәм «Спорт планетасы”нда “яшәүчеләр” белән аралаштылар. Күңелле бәйрәм тамашасы ахырында Җир планетасы “тылсымчысы” барлык укучыларга бәйрәм күчтәнәчләре өләште.

Соңгы яңарту: 2021 елның 10 феврале, 09:50